ఒక తెల్ల పావురం - ఒక ఎర్ర గులాబీ

నాగరికత కొత్త దారి వెతుక్కొంటోoది
బంకర్లలో చరిత్ర నిర్మితమౌతోంది
లోహ విహంగాలు నీడలు పడ్తున్నాయి
నీ తల ఫైన వేలాడే కత్తి కి
నువ్విప్పుడు మోకరిల్లి
ప్రణామాలు ఘటిoచాలి !
ఎడారి తుఫాను లో ఒంటరి పావురం
ఒయాసిస్సు నిండా రక్తపు కలువలు
చూస్తున్న ప్రపంచం ఒక యుద్ధ కాండ.
రూపాలకు ముసుగులతో
స్వరూపాలు మార్చుకొని
నామరూపాలు లేకుండా
ఒక్కోసారి కీకారణాల్లో ,ఇసుక దిబ్బల్లో ,కొండ చరియల్లో,
నడి సంద్రాల్లో,భూగర్భాల్లో...
పరుగు ఆగితే ప్రాణం వైతరణి లో చిక్కు కుంటుంది !

యమపాశం పట్టుకొని నిల్చున్నవాడు

సామ్రాజ్య కాంక్ష అతడి తల ఫై కిరీటం
ఉక్కుపాదాలు,ఇనుప గొలుసులు ,ముళ్ళ పంజరాలు

మనిషికి స్వేఛ్చ ఒక మందు పాతర .

.తీరని కల ..కల్పితం... కల్లోలం ..!
నెత్తురు అంటని నేల ముద్దాడాలని ఉంది...

మన రాజ్యం మనకు ఎప్పుడు వస్తుంది ?
యుద్ధం ఇంకా ముగియ లేదు .
ఆయుధం అంతరించి పోనూ లేదు
ఎక్కడో ఓ చోట నిమిషం క్రితం కూడా
బుల్లెట్ - హృదయం తో మాట్లాడే ఉంటుంది
ఒక ఎర్ర గులాబీ పుష్ప గుచ్చం నివాళి గా మారి
రాతి సమాధి ఫై నవ్వుతుంటుంది !
ఆర్తనాదం కూడా వినపడనట్లుగా
ఈ లోకం జీవిస్తూ,నటిస్తూ ఉంటుంది .
ఒక శకం ముగిసి…
నాలుగు దిక్కులు ఎరుపెక్కిన తర్వాత ..

మరణం అంచున మహోదయం!
ఒక తెల్ల పావురం వాలడానికి ,
ఒక తెల్ల గులాబీ పూయడానికి ,
ఇప్పుడు కాసింత చోటు కావాలి..!
నువ్వు నడిచే నేలఏదైనా కావచ్చు ..

.చివరాఖరికి నువ్వో గుప్పెడు మట్టి వై …
కరిగిపోయిన కర్పూర దీపమై…మిగిలిపోతావు ...!