హంపి బజార్ (ఒక శిథిల జ్ఞాపకం )

చరిత్ర
చరిత్ర పాఠం
రెండూ వేర్వేరు
ఎతైయిన శిఖరం ప్రక్కనే లోతైన లోయలా!

చంద్రుని క్రింద ఉన్న
ఈ లోకం లో ప్రతిదీ మారుతూ ఉంటుందని
మరోసారి ఇలా లిఖించు కుంటూ...
ఒక జండా కింద
దిగ్విజయం గా వెలిగిన
చరిత్ర ఇప్పుడక్కడ లేదు .

ఏక కాలం లో
పగలూ రాత్రీ వీక్షించిన హంపి బజార్
చరిత్ర సమాధి మీద
గడ్డి ఇప్పుడిప్పు డే ఆకుపచ్చగా ...
ఎన్నెన్నో చూసిన నేల ;

పల్లకీ లో
రాణివాసపు స్త్రీలు
అపూర్వం గా విచ్చేసి ఆభరణాలు
ముచ్చట పడి కొనే దృశ్యం
పచ్చలు ,పద్మరాగాలు ,పగడాలు ..
ముత్యాలు ,కెంపులు ,రత్నాలు ...
నడి వీధి లో రాశులైన స్వర్ణ సౌందర్యం
ఆ వైభవాన్ని చూస్తూ
ఠీవి గా రొమ్ము విరుచుకొని
ప్రభువులు వీధులను సందర్శించే కాలం…
రథా రూడులై
ఇప్పుడిక ఎవరూ అటు రానవసరం లేదు
హంపి నగర యాత్ర
ఒక అసంపూర్ణం .

గడ్డి కాగితం ఫై ఈక కలంతో
మాస్టర్ ప్లాన్ గీశారు..
ప్రోక్లినర్ రాక్షస అవతారం ఎత్తింది .
చివరికి -
శిలలు ద్రవించి ఏడ్చినవి !
ఈ అజ్ఞానపు వృత్తాంతాన్ని
ఇకనైనా ఒక శాసనం చెక్కి
తుంగ భద్ర లోయ శిఖరం ఫై
నిలబెడితే గుర్తుగా ఉంటుంది .
ఇప్పుడు
విరుపాక్ష సన్నిధి బోసిపోయింది .
ఎప్పడైతెమాత్రం
మనం చరిత్రను మిగుల్చుకున్నాం !
న్యూనిజ్,ఫెరిస్టా లకు కూడా
దిమ్మ తిరిగి మైండ్ బ్లాక్ కావలసిందే.
ఇప్పుడిక
విద్యారణ్యయతింద్రులకు
ఎవరు జవాబు ఇస్తారు?
తప్పదు -
'మధుర విజయం' ప్రదర్శన లో
సవరణలు చేసుకోవాలి .
బంగారు జరీ అంచు
వస్త్రాల కోసం -కురువిందల కోసం -
గరుడ పచ్చల కోసం
ఇప్పుడేవ్వురూ
చరిత్రను అన్వేషిం చాల్సిసిన అవసరం లేదు .
ఇప్పుడక్కడ చరిత్ర లేదు !
హంపి బజార్
ఇక -
మ్యూజియం లో
ఒక ఛాయా చిత్రం మాత్రమే !

( 16 వ శతాబ్దం నాటి విరుపాక్ష దేవాలయం ఎదురుగా కనిపించే హంపి బజార్ ను మాస్టర్ ప్లాన్ లో భాగంగా కూల్చివేసిన ఘటన కు విషాదంగా....)